النتائج 1 إلى 3 من 3

الموضوع: أنا الجاسوس ../ الناصر حجازي

  1. أنا الجاسوس ../ الناصر حجازي

    ومن العامية أيضاً ...روائع
    قصيدة "أنا الجاسوس"


    للشاعر الكبير

    عبد الناصر حجازي

    ............
    أنا الجاسوس اللى انتوا بتحاكموه بتهمة إتصاله بالعدوّ
    وكل واحد فيكوا حضر" لى القرار والمشنقة
    من غير ما تلسع قلبه نارى ،
    أو يعيش لحظة فى مرارى ،
    أو يحسّ بأزمتى
    لو قلتوا قبل ما تتشنق نفسك فى إيه ؟
    هاقول : تدوّى صرختى ،
    تدّونى فرصة اصرخ واقول لكوا كلمتى
    بعدين تحطوا المشنقة ..
    فى رقبتى لجل احصل على ( حريتى )
    أنا الجاسوس اللى اتصل بعدوّكم ..
    لما اكتشفت .. إن انتوا أعدائى الأشدّ ،
    انتوا الوحوش المصّة دمى وآكلة قوتى
    انتوا اللى بتتاجروا بحياتى ولسه هتتاجرم بموتى
    إسمعونى .. يمكن ابقى لحدّ من أحفادكوا درس من الدروس
    أنا الجاسوس اللى النظام لعب بأحلامى الإزاز
    ومشيت فى وسط الاحصنة مركّب جهاز
    ضهرى الخسع .. سّبب لبطنى الضرب من كل اتجاه
    نهرى الفقير .. ممنوع يصبّ فى بحركم ،
    ممنوع يكون لى زيّكم ضلّة وشجر
    بتزرعونى ف لحظة الشهوة الحرام ..
    وبتقطفونى فى العطش ،
    بتخصخصوا حريتى ..
    وبتخطفونى بالقانون
    وبتلغوا عقدى مع الحياة بطلب إحاطة
    سلّمتوا أحلامى للصوص العولمة ..
    وقبضتوا حقى بالدولار
    ضحية بين شاشات إباحة .. شيوخ بلاستيك .. كل أشكال القمار
    ع الزيرو 900 حقق حلمك الميّت وكرّر لاتصال
    وتحوّلوا الحلم لحسابكم فى البنوك
    أنا عبدكم ... وانتوا الملوك
    أنا الحرس ... وانتوا النيام
    أنا القيام ... وانتوا الجلوس
    أنا الجاسوس ...
    اللى اتعمل لى ألف جنحة وألف محضر ...
    يوم ما فكرت انى ابيع فاكهة وخضار ،
    وكفرت بالحج اللى عارضاه الحكومة .. للى يكسب فى القمار ،
    أنا الفقير المستحى ،
    أنا النجيل المستباح
    بيتّهمنى المرتشى واللص والقواد ..
    عشان ماليش ضوافر أو حشف
    احكم بسرعة يا قاضى قبل ما تنكشف زى الرفاق
    احكم بسرعة أنا فى اشتياق اروح لقاضى بجدّ عادل
    هوّ اللى أعلم بالنفوس
    أنا الجاسوس اللى انتوا جوّعتوه لحدّ ما عضّكم
    اللى اترمى فى الحجز لحظة ما اللصوص طلعم براءة ،
    بعت صوتى ع البطاقة بحق فرخة ..
    وانتخبت اللى استباحنى ،
    اللى يوم العيد دبحنى ،
    واشتكانى لما زاد وجعى وصرخت
    وقلتم ان الثّورة أنهت ع الفوارق
    الفوارق فى ازدياد ،
    وكل خرم فى مصر بيفيّص فساد ،
    وفيه طبقتين فى البلاد :
    الأولى بتهيّأ حريمها للخديوى ،
    والتانية بتشحّت عرابى قلوبها حاف
    الأولى بتضاجع عدّوى ..
    والتانية بتحّميها بدموع العيال
    تلاتين سنة وبقبض تراب ..
    فى مصالح المغضوب عليهم
    المحرومين من أى ميزة وأى ( كادر )
    أما اللى كرشه بيشغى دود ..
    اللقمة من إيده بحلل
    هو اللى يسرق واتحبس دايما مكانه ،
    هو سلطاننا فى زمانه
    أما انا ...ع السلّمة الواطية افضل احبى
    واشدّ فى هدوم الرغيف
    ولو مشيت عكس اتجاهكم ...
    يتعمل لى مخالفة وأتّاخد تحرّى ..
    واصرخ ما فيكم حدّ فكّر يلتفت
    وغصب عنى بتحلمم ،
    وغصب عنى ليلاتى يرعبنى الكابوس
    أنا الجاسوس اللى انتوا من ستين سنة بتستعبدونى
    تضحكم دايما بدونى
    بس وقت اللطم بتحنّوا لخدودى ،
    بتسرقوا الخطوة اللى رجلى محوّشاها
    رجلى اليتيمة الماشية تئزح ع البارود
    أما انتوا رجليكم بتضغط من زمان ..
    على بقّى والأمر السيادى : اسكت وبوس
    أنا الجاسوس ..اللى ان ديدان البلهارسيا تحشّ كبدى ..
    ما لقاش فى مستشفى الأميرى ..
    غير شريط طباشير ما يسوا التذكرة ،
    والطيارات محجوزة للرقاصة تتعالج بأمر من الولي
    ساذج وصدّقت الولى..
    فى يوم ما قاللى: همنع الدرس الخصوصى ..
    لجل تلقى للعيال تمن الرغيف ،
    و ف يوم ما قال ان المناصب والمراكز والمجالس ..
    من هنا ورايح هتبقى للشريف ،
    وف يوم ما قال شجر العدالة هيرمى ضله على الضعيف
    وما خدت من مطر الوعود الا البخار ،
    واستسلم الكبش الضحية للرحيل
    هموت بدلكم وانتوا تحيوا نيابة عنى
    مانا عشت عمرى اعرق بدلكم وانتوا تقبضم الفلوس
    أنا الجاسوس
    حبيت اجرب مرة حق الإختيار
    حبيت اجرب وأنتخب مرة بإرادتى ..
    فانتخبت عدوكم ..
    واختّرت ابيع العمر للّى يدفع أكتر
    ادبحونى واشحنوا بدمى الموبايلات اللى جايّة لكم ( كادوه ) ،
    أو فوّلوا بدمى الرخيص السيارات آخر موديل
    أو اشنقونى واقطعم ديل الخيانة
    مع إن كان مفروض عليكوا تبدؤا بقطع الرؤوس
    أنا الجاسوس اللى حساباتى كلها طلعت غلط
    جيت اختبر حريتى قلت لآمون :
    العهد طوّل ..
    والرعايا نفسهم يمشوا فى جنازتك
    قام حالفلى ما يمشى غير لو ساب وريث .. ياخد عزا كل الرعايا !
    فمشيت وراه ساكت ..
    ورغم سكاتى سابنى فى الطريق ..
    وتهت علما ان انا صاحب الفانوس
    أنا الجاسوس .. وكلكم جواسيس
    بتتقابلم مع الأعداء فى نص الليل ..
    بتتفقوا .. وتتواصلوا ..
    وبتتاجروا .. وبتفاصلوا ..
    وتتساهلوا ف تمن دمى ،
    بتنسوا ( قضية الأسرى )
    وتفتكروا اللى من قهره استجار بالريح ..
    وحاول يلقى فى الليل العقيم طلق الشموس
    ...........................
    آدى الدفاع عن نفسى وادى التبريرات
    حضّرتهم ..عشان اقولهم لو صحيح ..
    القهر زوّد أزمتى ،
    ولقيتنى مضطر إنى أكون .. فعلا .... جاسوس
    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    ( ليس عليك أن يقنع الناس برأيك ،، لكن عليك أن تقول للناس ما تعتقد أنه حق )



    يارب: إذا اعطيتني قوة فلاتأخذ عقلي
    وإذا أعطيتني مالا فلا تأخذ سعادتي
    وإذا أعطيتني جاها فلا تأخذ تواضعي
    *******
    لم يكن لقطعة الفأس أن تنال شيئا ً من جذع الشجرة ِ لولا أن غصنا ً منها تبرع أن يكون مقبضا ً للفأس .

    من مواضيع :


  2. #2
    الأخت الفاضلة ريمة الحانى
    أشكرك كل الشكر بالنيابة عن صديقى الشاعر عبد الناصر حجازى
    فهذه القصيدة شكلت نقلة نوعية فى العامية المصرية وبخاصة بعد اتجاه غالبية الشعراء لأتجاهات أبعدتهم عن المتلقى العادى البسيط الذى هو فى النهاية المستقبل الشرعى لما يكتبه الشعراء
    والقصيدة العامية فى العقود الثلاثة الماضية ترنحت بين التجديد والحداثة ومحاولات التمرد على المألوف من الجيل الجديد من السرب المحلق فى سماء الكتابة الشعرية إلا أننا نتفق على ان الزمن كفيل بعملية الغربلة وتصفية الوضع على حالة سوف يتم رصدها بمجرد أكتمالها .. فالشعر الشعبى هو ملك للعامة وليس ملكا للخاصة من المثقفين والشعراء والنقاد ، وكثير من الأصوات الشعرية التى ظهرت على الساحة لم تأتى بجديد حتى الأن على أعتبار أننا تلقينا كل أشكال الكتابة من السلف بداية من ( بن عروس ) وقبل نهاية النصف الأول من القرن الماضى برز (العملاق بيرم التونسى) وأدعيه بهذه التسمية لأنه حقه ، وحقه علينا لأن بيرم كتب العديد من أشكال الكتابة العامية وليست الكتابة الزجلية كما يعتقد البعض ( الزجل ــ الرباعية ــ فن الواو ــ الطقطوقة الغنائية ــ الأغنية ــ الفوازير الشعرية ) وبشائر العامية المصرية ، والتى أفضى فى أشكالها ( الشاعر الكبير فؤاد حداد ) ويلازمة فى المرحلة ذاتها ومن بداية النصف الثانى من القرن العشرين (الشاعر الجميل صلاح جاهين ) وهؤلاء بالتحديد تعلمنا منهم وستظل كل الأشكال التى خرجت من بين أيديهم هى القاعدة الأساسية لكل الكتابات واعترف بأن هناك شعراء أيضا كان لهم تفوقهم على الساحة الثقافية والإبداعية كالشاعر الكبير ( عبد الرحمن الأبنودى ) و ( الشاعر سيد حجاب ) فتميزهم يخصهم من حيث ملامحهم المعروفة وصوتهم المميز .. لكن الحقيقة التى لا تغيب عن أحد أنهم رغم براعتهم فيما قدموه إلا أنهم لم يقدموا شكلا جديدا للقصيدة العامية. كحال كل الشعراء المصريين على الساحة الإبداعية وهناك عشرات من الأسماء الكبيرة .. ولكن كما ذكرت لم يخرج من بينهم شكلا جديدا يضاف لأشكال الكتابة بالعامية يضاف للأشكال التى ذكرتها عند بيرم وحداد وجاهين .
    وقليل ومع كل هذا الحشد من الشعراء وزخم القصائد التى نتلقاها يومياً أن تخرج قصيدة من عيار ( أنا الجاسوس ) لعبد الناصر حجازى الشاعر المصرى الذى لايمتلك فى ديوان العامية غير مجموعة واحدة صدرت له العام الماضى 2007 بعنوان ( بنعيش بنص روح ) صادرة عن قطاع التقافة الجماهيرية بورزارة الثقافة المصرية ضمن مشروع يعرف باسم النشر الإقليمى التابع للهيئة العامة لقصور الثقافة .. ولولا أن أتيحت له هذه الفرصة للطباعة ماكان سيقدم على عملية الطبع على نفقته الخاصة وسيكتفى بنشر الجرائد والدوريات الأدبية والمجلات المعنية بتقديم كتاب الأمة للأمة.
    أطلت عليكم ( معذرة ) وتقبلوا منى كل الشكر والتقدير
    ومرة ثانية أشكرك أخت ريمه الحانى لتفضلك وعرض هذا النص .
    دمتم جميعا بكل الخير
    الشاعر
    محمدأسامة البهائى

  3. #3
    شكراً لأم فراس على هذا الطرح الرائع
    وشكراً للتوضيح و التقديم من شاعرنا المتميز محمد اسامة

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المواضيع المتشابهه

  1. العثور على مادة "البولونيوم 210" المشعة في جسم الجاسوس الروسي المنشق
    بواسطة عبد الرحمن سليمان في المنتدى فرسان الأخبار.
    مشاركات: 0
    آخر مشاركة: 07-04-2015, 06:51 AM
  2. عبد الناصر وفلسطين
    بواسطة رائف دياب في المنتدى فرسان الأبحاث الفكرية
    مشاركات: 0
    آخر مشاركة: 07-24-2013, 12:54 AM
  3. حسن حجازي وعرب فيس بوك /أ/ محمد الناصر بوزيد
    بواسطة حسن حجازى في المنتدى فرسان الأدبي العام
    مشاركات: 2
    آخر مشاركة: 11-05-2012, 12:59 PM
  4. مشاركات: 0
    آخر مشاركة: 06-24-2012, 03:01 AM
  5. بحث عن قبيلة الناصر
    بواسطة ملده شويكاني في المنتدى فرسان العائلات العربية والتراث.
    مشاركات: 3
    آخر مشاركة: 04-17-2010, 10:00 PM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •